پاکستان میں پیٹرول اب بھی سستا ہے: شوکت ترین

وفاقی وزیرِ خزانہ شوکت ترین کا کہنا ہے کہ اس وقت پیٹرولیم لیوی دو، ڈھائی روپے ہے، ہم نے پیٹرولیم لیوی کے لیے 600 ارب روپے رکھے ہیں لیکن ہم نے یہ نہیں لگائی، پاکستان میں پیٹرول اب بھی خطے اور دنیا میں سستا ہے۔

اسلام آباد میں میڈیا سے گفتگو کرتے ہوئے وفاقی وزیرِ خزانہ شوکت ترین نے پٹرول مہنگا کرنے کا دفاع کرتے ہوئے کہا کہ وزیرِ اعظم عمران خان نے لیوی لگانے سے منع کیا ہے، انہیں غریبوں کا احساس ہے اس لیے زیادہ اضافے سے منع کیا، خطے میں پیٹرول کی قیمتوں میں پاکستان 17 ویں نمبر پر ہے۔

انہوں نے کہا کہ کورونا وائرس نے ہمیں متاثر کیا ہے، ہم فوڈ امپورٹر بن گئے ہیں، ہم زراعت بڑھانے کے اقدامات کر رہے ہیں، ہم گھی، چینی، دالیں امپورٹ کر رہے ہیں۔

شوکت ترین کا کہنا ہے کہ وزیرِ اعظم عمران خان عوام پر بوجھ میں کمی لانا چاہتے ہیں، ہم لوگوں کو مچھلی نہیں دیں گے، مچھلی پکڑنا سکھائیں گے۔

ان کا آئندہ کچھ دنوں میں مہنگائی کم ہونے کا دلاسا دیتے ہوئے کہنا ہے کہ حکومت کو نقصان ہو رہا ہے لیکن فیصلہ کیا کہ نقصان کے باوجود چینی 90 روپے کلو بیچیں گے، غریب طبقے کو براہِ راست سبسڈی دیں گے۔